മുന്നൊരുക്കം
ആദ്യമായി പ്രസംഗ മത്സരത്തിൽ പങ്കെടുക്കുമ്പോൾ പ്രസംഗകലയെക്കുറിച്ച് ഒരു ധാരണയും എനിക്ക് ഉണ്ടായിരുന്നില്ല. 74 മുതൽ 79 വരെയുള്ള കൊച്ചി വാസം എന്നെ എന്തും ഏതും വായിക്കുന്ന സ്വഭാവക്കാരനായി മാറ്റിയത് കൊണ്ട് സത്യത്തിൽ 5 മിനിറ്റ് മുമ്പ് “ബോധനമാദ്ധ്യമം മലയാളമോ, ഇംഗ്ലീഷോ” എന്ന വിഷയം കിട്ടിയപ്പോൾ ഒരു പരിഭ്രമവും എനിക്ക് തോന്നിയില്ല എന്നത് വാസ്തവം. പക്ഷേ അത് പോരല്ലോ? അച്ഛൻ എനിക്ക് പ്രൊഫ. ഹരീന്ദ്രനാഥക്കുറുപ്പിന്റെ ‘നിങ്ങൾക്കും പ്രസംഗകനാകാം’ എന്ന പുസ്തകത്തിന്റെ ജൂനിയർ, സീനിയർ പതിപ്പുകൾ വാങ്ങിത്തന്നു. വിവിധ വിഷയങ്ങളിൽ തയ്യാറാക്കപ്പെട്ട പ്രസംഗങ്ങളുടെ സമാഹാരങ്ങളായിരുന്നു അവ.
ഞാനാ പുസ്തകങ്ങൾ വായിച്ചു നോക്കി. പക്ഷേ അവ അതേപടി പഠിച്ചവതരിപ്പിക്കുന്നതിൽ കാര്യമില്ല എന്നെനിക്കു തോന്നി. പകരം എന്റെ വായന വിപുലീകരിക്കുന്നതിനും, വിവിധ വിഷയങ്ങളിൽ നോട്ട്സ് കുറിച്ചു വയ്ക്കുന്നതിനും ഞാൻ ശ്രദ്ധിച്ചു. നോട്ട്സ് യഥാവസരത്തിൽ പുതുക്കുന്നതിനും ഞാൻ മറന്നില്ല. ഇതൊക്കെ കൊണ്ടു തന്നെ തൽക്ഷണ പ്രസംഗത്തിൽ സജീവമായിരുന്ന കാലത്ത് എനിക്ക് ബുദ്ധിമുട്ടുകൾ ഒന്നും തോന്നിയിരുന്നില്ല.
എന്റെ അഭിപ്രായത്തിൽ പ്രസംഗ മത്സരങ്ങളിൽ പങ്കെടുക്കുന്ന കുട്ടികൾ ആദ്യമായി ചെയ്യേണ്ടത് തങ്ങളുടെ വായനാശീലം വർദ്ധിപ്പിക്കുക എന്നതാണ്. പത്രങ്ങൾ, പുസ്തകങ്ങൾ, വാരികകൾ…. കൈയിൽ കിട്ടുന്നതെന്തും, ത്യാജ്യ ഗ്രാഹ്യ വിവേചനബുദ്ധിയോടെ, വായിക്കുക. വായിച്ചതിൽ കൊള്ളാമെന്ന് തോന്നുന്നതെന്തും…. കവിതാ ശകലമോ, കഥയിലെ വരിയോ, ലേഖനത്തിലെ ഉള്ളടക്കമോ എന്തും… ഒരു പുസ്തകത്തിൽ ഭാവിയിൽ ഉപയോഗപ്പെടേണ്ടതിലേക്ക് കുറിച്ചിടുക. മാദ്ധ്യമങ്ങളിലെ ചർച്ചകൾ നല്ലവ തെരഞ്ഞെടുത്തു കാണുക. പ്രസക്തമെന്ന് തോന്നുന്ന വിഷയങ്ങൾ തെരഞ്ഞെടുത്ത് സ്വയം വിശകലനം ചെയ്യുക. മുതിർന്നവരോട് ചർച്ച ചെയ്ത് സ്വന്തം വിശകലനങ്ങളിലെ പോരായ്മകൾ തിരുത്തുക. നല്ല പ്രസംഗങ്ങൾ, സാനു മാഷിനെ പോലെയുള്ളവരുടെ, തേടിപ്പിടിച്ചു കേൾക്കുക. ഇത്രയുമെങ്കിലും ചെയ്താൽ പ്രസംഗ മത്സരങ്ങൾക്കായുള്ള ശരിയായ മുന്നൊരുക്കമായി എന്നുറപ്പിക്കാം. മറ്റുള്ളവർ എഴുതിയ പ്രസംഗങ്ങൾ കാണാതെ പഠിക്കുക മാത്രം ചെയ്താൽ, ഒരിക്കലും നിങ്ങൾ ഒരു നിലവാരമുള്ള പ്രസംഗകൻ ആകാൻ പോകുന്നില്ല എന്നാണ് എന്റെ അഭിപ്രായം.
ഇത്രയും മുന്നൊരുക്കത്തെപ്പറ്റി. 5 മിനിറ്റ് നേരത്തെ ഒരു തൽക്ഷണ പ്രസംഗത്തിന് 10 നിർണായകമായ മിനിറ്റുകൾ ഇനിയുമുണ്ട്. വിഷയം കിട്ടിയ ശേഷമുള്ള 5 മിനിറ്റും, പ്രസംഗത്തിന് അനുവദിച്ചിട്ടുള്ള 5 മിനിറ്റും. ഈ 10 മിനിറ്റ് എങ്ങനെ കൈകാര്യം ചെയ്യണമെന്നതിൽ എന്റെ കാഴ്ചപ്പാട് അടുത്ത തവണ